القطار و الحواديت

مليون طريق و مليون طريقه

مليون حديث , مليون روايه

مليون نهايه , و قبلهم مليون بدايه

كتب و قلم ,حطان و ورق

بنت صغيره بتشب على الشباك

راجل عجوز بيبص من بين حديد السجن على الهواء

قطر ماشي بيزمر يعلن بدايه نهاية الطريق

ما بين المدن ماشي و شايل معاه الف الف حكايه من زمن

و في كل بلد يوقف يغني غنوته عن صبيه و عن ولد

و في كل محطه يسيب على الجدران ورق

قصايص لمها من الزمن قصاقيص مش مهمه في حد زاتها

لكن جواها تلقى عبر عن ازمان عن احداث عن بني ادمين

عن بنت صغيره و راجل عجوز عن صبيه و عن ولد

عن ام شايله جننها جواها و بتلف على الرزق بين خلق الله

عن اب شايل الحمل و قرر يجيب الرزق لضناه

و عن وعن حاجات كتير و ناس كتير

كسرها الزمن , كسرها العوز للقمه و ملاها شجن

و نرجع تاني للبدايه على المحطه على الدكه

بنت حلوه بضفاير شايله شنطه بيضه صغيره

واقفه تاخد قطار الساعه 6

و جانبها على الناحيه التانيه ولد حليوه اسمراني

لونه زي لون طمي النيل

واقف يبص عليها من بعيد

خايف لاقلبه يفط ينط منه مع الصبيه المعجبانيه

ام الضفاير الحلوين

و دي حدوته من حواديت

و خدها معاه القطر و سارح في ربوع النيل

يا شمس يلي بتشرقي على القطر و المواويل

نوري لي الطريق و لكل العاشقين

دعوة مواطن مطحون

انا وانت اصحاب من زمان
انا و انت يا حماري
في البلاد دايرين
و على رزق ولادي شقيانين
و بنسال مين و من فين ؟
مين يدلني و يدلك يا حماري
على الطريق , طريق بلاد النيل
بنلف كعب داير
في بلاد الله الواسعه
على فيض الكريم ماشين
رزقي و رزق عيالي عليك يا رب
رزقي و رزق عيالي عليك يا كريم
انا و انت اصحاب من زمان
انا و انت يا حماري
شفنا و لسه حنشوف
طول ما احنا عايشين في بلاد العجب
في بلاد غاب عنها الضؤ و الضي
و عشعشت فيها الظلمه حتي في الزخانيق
و الشكوى لغير الله مذله
و انا شكوتي ليك يا كبير
انا مش مهم
المهم عيالي الغلابه الي على لحم البطن نايمين
و امتى بقى الشمس طتلع و تنور الميادين
و امتى استريح انا و انت يا حمار الشقى
من الف و الحيرة لجل حتة عيش حاف تسد جوع مين و له مين
تكالي عليك يا رب
انت عارف المساكين
تكالي عليك يا رب
اصلها خلاص خرجت من ايد البني ادمين
تكالي عليك يا واحد
ارحم عيالي الغالبنين

من الصفر الى العشرين

من الصفر للعشرين
كبر الشبل و بقي اسد متين
بيزمجرعلى خطى المستقبل و ملوش كبير
ماشي يدب و خطوته على الارض صب

من الصفر للعشرين
كبرت البنت و شبت
و بقت شبه تمد الخطى على الساحل الطويل

من الصفر للعشرين
كبر الولدو بقى فارس
فارس يركب حصانه و يطير
و في جرابه سيف من الحديد

من الصفر للعشربن
طول الجناح و رفرف
و حلق فوق في السما
و على فوق السحاب و نمى

من الصفر للعشرين
كبرت انا و بقيت
كبرت انا و طلع لي صوت
كبرت انا؟
بقت احلام بتحقق
بقيت فرحة قلب
بقيت ضحكه و دمعه في تاريخ الحياة
بقيت ضحكه و دمعه في قلب الحياة
بقيت انسان بتضمه الحياة

الشمعه

احترت و احتار دليلى معايا
بين المراد و بين المفروض
بحور و عواصف ,جزر و جسور
جوايا حاجه بتشدنى لسفر و الترحال
براياه صوت بيهزنى و يقولى رايح فين؟
صوت الريح بيندهلى و ينادى عليا
ضوء الشمس بينور ليا الف طريق ما تمشيش
بس الشمعه على شباك بيتنا بتفكرنى بمكانى
الشمعه بتربطنى فى مكانى
كل عصفورة بتيجى تحكى لى حكاية
كل عصفورة بتقول لى ان ممكن يكون ليا الف و مليون حكايه
و انا كل ما انوى امشى ,كل ما انوى ارحل
تنادينى الشمعه و تكلمنى عن ليليها الطويله الوحيده
ليليها فى ظل الشتا و تقولى خليك هنا جنبى
نفسك يدفينى و قربك يطمنى و يخليني
و انا اقول حاضر و حط شنطتي و الغى المساءله
بس هما يومين و اسمع صوت البحر بيقول واقف ليه بتتفرج ؟
واقف ليه بتفرج و انت اتولدت بحار
واقف ليه بتفرج افرد الشراع
افرده يلا و حتلقى بدل المينا عشره و عشرين
و بدل الريح حتلقى عواصف و اعاصير
و انا عينى تزقزق فرحه و ارجع و انا ناوى امسك الدفه
لغاية ما اشوف الشمعه فلركن وحيدة ,فلركن حزينه
و ارجع اقول اقعد معها انهارده و ابحر بكره
بقى عندى 91 سنه و لسه بقول بكره حبحر
الشمعه خلصت و انا بقيت من غير حكاوى من غير حواديت
ما ملكش غير انتظار الصباح
لما العصفورة تيجى و تحكى لى عن بلاد بعيدة
بلاد ما شفتهاش لكن عرفتها ,عرفتها من الاحلام
عرفتها من لاحلام و حفظتها من الحواديت
و يا رتنى كنت رحت
و يا رتنى كنت بحرت
يمكن كنت وصلت

البائع

احلام ورديه احلام
افكار لولبيه افكار
و يا مين يشترى منى يا مين
يا مين ياخدهم و ياخد فوقهم اموال
احلام ورديه احلام
افكار لولبيه افكار
داير,وسط البيوت سارح
و شايل على كتفى احمال
صوتى اتنبح و قلبى من المحبه كل
صوتى اتنبح و عقلى من التفكير مل
احلام افكار احلام
و الزمن بيتفرج عليا و يضحك
و انا مكمل مشوارى و مش بوقف
و الزمن يتفرج عليا و يضحك
و انا ادق على كل باب اصادى
و اقول احلام ورديه احلام
افكار لولبيه افكار
و يا مين يشترى منى يا مين
با مين ياخدهم و فوقهم اموال
احلام ورديه احلام
افكار لولبيه افكار
داير, وسط البيوت سارح
و جوه قلبى اغنيه بدور على شاب عفى يكمل المشوار
داير , وسط البيوت سارح
و جوه عنيه رؤيه بدور على صبيه معجبنيه تكمل الموال
احلام افكار, افكار احلام
يا مين يشترى يا مين
طب مين حتى يبيع
و انا ا شترى منه و باغلى الاسعار

افكار

ناس رايحه و ناس جايه و ناس كده معديه
ببص و اشوف حاجات غريبه و عجيبه
ناس ميهمهاش لبها ضهر لبها ناس
و ناس تخاف تكش لا ليها ضهر و لا حتي وش
و ناس اه مضياها و حبة ايام و معدياها
و ناس تانيه بصبر و جد بتزرع و تفلح وتجد
و وسط كل ده تلقى الضد
فى الشكل و اللون و الفكر
و احلام تروح فى الرجلين فى وسط كل اللعبكه
و شباب يروح فى النسيان فى وسط كل الهمبكه
ده مجتمعنا فى وسط الزحمه
ماشى يكعبل و يوقع
ما بين تيررات جايه من كل الاتجاهات
جايه تهزه و بجبروتها توقعه
لازم نفوق و ناخد بالنا من احوالنا
لازم نفوق لاجل نعلى على اختلافتنا
لازم نخلى بالنا على عقولنا
لازم نخلى بالنا من الى بيملى افكارنا
لازم نخلى بالنا من الى جاى يحاول يرسم احلامنا
من الى جاى يلعب بقلوبنا
من الى جاى و فاتح ايده
و البسمه على شفته
بس الله و اعلم جوه القلب اه